Verlate plase 'staat se skuld'

As grondhervormingsplase nie verlate, geplunder en onproduktief gelê het nie, sou dit nie nodig wees om drastiese regstellingsplanne aan te kondig nie, meen dr. Theo de Jager, adjunk-voorsitter van Agri SA.

Volgens me. Lulu Xingwana, Minister van Landbou en Grondsake, sal die staat grond wat nie volgens vereistes gebruik word nie onmiddellik terugvat en aan mense wat ernstig is oor die landbou oorhandig.

"As die Departement van Grondsake nie aan korrupsie, nepotisme, laksheid en wanbestuur mank gegaan het nie, sou die minister dit nie reeds nodig gevind het om 'n direkteur-generaal en drie provinsiale grondeiskommissarisse te ontslaan nie," het De Jager gesê.

De Jager het ook gesê dat Agri SA die noodsaaklikheid van grondhervorming erken. Agri SA en sy affiliasies steun die vestiging van nuwe swart boere en wil help om van grondhervorming 'n sukses te maak.

De Jager meen dat botsings tussen begunstigdes, onduidelikheid oor regte, onvoldoende en langsame vordering ten opsigte van toegang tot ontwikkelingsfinansiering en 'n gebrek aan kundigheid maar net 'n paar probleme is waarmee die grondhervormingsboere te doen het.

Daar is wel meriete in die minister se plan om plase wat nie benut word nie, terug te vat. Suid-Afrika kan in die huidige globale ekonomiese krisis dit nie bekostig om landbougrond ten duurste aan te koop en dan die produksievermoë daarvan te laat verval nie.

Volgens De Jager moet plaaslike oplossings vir die probleem gesoek word.

"Rolspelers in plaaslike forums moet byeengebring word om grondhervorming met sinvolle landbou-ontwikkeling te koördineer," het De Jager gesê.

9 Maart 2009