Vleisbeesteler van die Jaar

Mnr. Llewellyn Angus, Simmentalerboer van Arlington, is vanjaar Landbouweekblad en Breedplan se Vleisbeesteler van die Jaar. Dié toekenning is verlede week in Bloemfontein aan hom oorhandig.

Hy wen 'n studiereis na Amerika. Die twee naaswenners is mnre. Philip Barnard, 'n Angus-teler van Clocolan, en Russel Clark, 'n Hereford-teler van Dordrecht.

Die Melkboer van die Jaar is mnre. Johan en Tati Schoeman se LMJC-boerdery van Bothaville. Die naaswenners is Broadlands-trust, Inovula-boerdery, mnr. Andrew Masterson en mnr. C.S. Puttergill.

Die Ontluikende Boer van die Jaar is mnr. Themba Dlodlo van Bulawayo in Zimbabwe. Hy het 'n beeesskaal wat deur Rudd-skale geskenk is, gewen.

Talle ander wenners is ook bekroon. Die telers met die beste koeigroepe met die ras waarin hulle koning gekraai het, is Loriza Brahmane, mnr. John en me. Tracey Devonport (Limousin), mnre. Jan Buitendag (Afrikaner), Philip Barnard (Angus), Peter Beith (Bonsmara), André Smit (Charolais), Gerrit Kruger (Hereford), Llewellyn Angus (Simbra) en Charles Olivier (Simmentaler).

Die Landbouweekblad-Breedplan-bul van die Jaar was: Die Angusbul, RL 01 326, van mnre. R.P. en L.E. Campher (Bloemfontein-skou), die Brahmanbul Anmaca Red-M 02 14 van mnr. Kallie D'Alebout (Pretoria-skou), die Brangusbul MM 02 82 van mnr. R. McMurray (Brangusskou), die Charolaisbul ACA 02 103 van mnr. A.A. Smit (Vryburg-skou), die Herefordbul KRM 10 024 van mnr. P.M. Brown (Royal-skou), die Limousinbul Devlan Luxour 02 45 van mnr. John en me. Tracey Devonport (Pretoria-skou), die Santa Gertrudisbul XY 02 74 van mnr. M.J. Britz (Vryburg-skou), die Simbrabul DM 01 288C van mnr. Diethelm Metzger (Windhoek-skou), die Simmentalerbul HPZ 02 25 van mnr. J.P. du Preez (Pretoria-skou) en die Sussexbul PLG 02 59 van mnre. Armitage en Garlick (Royal-skou).

Die Telers van die Jaar van elke ras, was mnre. Jan Buitendag (Afrikaner), Philip Barnard (Angus), W. Snyman (Bonsmara), Jan van Zyl (Brahman), Ferdie Naudé (Brangus), André Smit (Charolais), Russel Clark (Hereford), John en Tracey Devonport (Limousin) en Llewellyn Angus (Simbra en Simmentaler).

Voermol het sy Skaap- en Beesboer van die Jaar op die funksie aangewys. Die Skaapboer van die Jaar is mnr. Paul Grey, van Grey & Grey-landgoed by Ermelo. Die naaswenners was mnr. Wynand du Toit se Wydgelegen-boerdery van Protem en die Van As-broers van Swellendam wat deur mnr. Johan van As verteenwoordig is.

Voermol se Beesboer van die Jaar is mnr. Carl Durow van die C.F. Durow-trust van die Suidelike Streek. Die naaswenners is mnre. Jacques Swart van die Melemba-boerdery in die Noordelike Streek en mnr. Dirk van Niekerk van C.J. Van Niekerk en Seuns van die Oostelike Streek.

12 November 2004