Vleisboere vra steun

Die TLU SA is versoek om weer sy beeskomitee op been te bring om sake te hanteer wat die Rooivleisprodusente-organisasie (RPO) nie kan hanteer nie.

Boere het op die TLU SA se ekonomiese konferensie verlede week in Pretoria gesê dié komitee kan kwessies, soos produksiekoste van speenkalwers, vleisklassifikasie en verbruikers se voorkeure ondersoek met die doel om produsente te beskerm en volhoubare vleisproduksie te verseker.

Die vleisklassifikasiestels het ook onlangs op die RPO in Limpopo se kongres ter sprake gekom as sou die huidige stelsel verouderd wees en produsente én verbruikers benadeel.

Van die voorstelle wat reeds gemaak is, is dat die AB-graad uit die klassifikasiestelsel weggelaat word.

Boere meen die komitee sal groter druk kan uitoefen om oplossings te vind vir probleme, soos snotsiekte.

Die voorstel is gesteun deur mnr. Willie Lewies, ondervoorsitter van die TLU SA, wat aanbeveel het dat dit na die uitvoerende komitee verwys word.

Mnr. Bennie van Zyl, hoofbestuurder van die TLU SA, het aan Landbouweekblad gesê die organisasie neem kennis dat van sy lede ongemaklik is met die funksionering van die RPO in sekere gevalle.

Hy het egter benadruk dat die TLU SA die bedryfsorganisasies steun en dat die probleme as 'n saak van dringendheid met die RPO bespreek sal word.

Landbouweekblad, 18 Mei 2007