Vleisheffing lok reaksie

Verlede week se besluit op die RPO se kongres waarin 80 % van die afgevaardigdes ten gunste van 'n vleisheffing gestem het, het uiteenlopende reaksie onder rooivleisprodusente in die Oos-Kaap uitgelok. Dié provinsie het hom vroeër vanjaar op Cradock teen 'n statutêre heffing uitgespreek.

Mnr. Claude Cloete, voorsitter van Wol Suid-Afrika, sê dit wil lyk asof daar politieke druk op die Landboubemarkingsraad uitgeoefen is om sy vroeëre aanbeveling rondom die heffing aan die Minister van Landbou, ongedaan te maak.

Cloete sê hy staan by vorige standpunt dat die inkomste wat uit die BTW op rooivleis verdien word, eerder gebruik behoort te word om die funksies wat die RPO met die statuêre heffing nastreef, te vervul. "Hoewel daar gehoop word dat die heffing sowat R30 miljoen sal inbring, gaan dit geweldig duur wees om dit in te samel."

Mnr. Richard Glennie van Somerset-Oos sê hy en 'n mede-afgevaardigde, mnr. Louis Slabbert, het besluit om nie die kongres in Pretoria by te woon nie aangesien die Oos-Kaap se standpunt teen 'n heffing nie in die sakelys genoem was nie.

Mnr. Gawie Swart, voorsitter van die Oos-Kaapse RPO, sê die drie afgevaardigdes van die Oos-Kaap wat die kongres bygewoon het, het wel teen die heffing gestem. Hy meen die bemarkingsraad se besluit sal voor einde Julie bekend wees.

Mnr. Albie Jacobs van Steytlerville sê hy is verheug dat die RPO met só 'n groot meerderheid ten gunste van die heffing gestem het. "Die belangrikste betrokkenes in die vleisbedryf steun die heffing en produsente sal daarby baat vind," meen hy.

Mnr. Anton Olivier, 'n afgevaardigde van Cradock, sê hy is bly dat die RPO met só 'n groot meerderheid ten gunste van die heffing gestem het. "Iets moet gedoen word om te keer dat die verbruik van rooivleis verder afneem."

Olivier sê hoewel 20 % van die afgevaardigdes op die RPO se kongres teen die heffing gestem het, is hy oortuig dat as 'n referendum onder produsente gehou word, net sowat 10 % van hulle daarteen gekant sal wees.