Voermol bekroon veeboere

'n Bekroonde veeboer van Noordwes en 'n skaapboer van Riversdal is in Bloemfontein as Voermol se veeboere van die jaar aangewys. Hulle is mnre. Frans van den Berg van Reivilo, wat verlede jaar die LNR se voorste vleisbeesboer was, en Geoffrey Joubert.

Van den Berg boer met Bonsmaras op 10 362 ha natuurlike weiding met 'n drakrag van 10 ha/GVE. Met sy voerbank-veldbestuurstelsel met lang rusperiodes, word die veld se dravermoë tot 30% bo die vasgestelde norm verhoog.

Joubert van Kweekkraal, Riversdal, boer met altesaam meer as 4 000 Merino-ooie en Merino/SA Vleismerino-kruisooie in 'n volhoubare versnelde teel- en kruistelingsprogram en handhaaf ?n hoë speenpersentasie.

Prof. Johan Greyling, van die Vrystaatse Universiteit, het as beoordelaar opgetree en sê die veebedryf in Suid-Afrika is gesond en lonend en beskik oor uitstaande presteerders. Van die aspekte wat in aanmerking geneem is, is vrugbaarheid wat een van die belangrikste aanduidings van 'n aangepaste dier bly.

10 November 2008