Volstruisrekord in kele af

Iran se poging om die grootste volstruistoebroodjie ter wêreld te maak was dalk onsuksesvol nadat die skare toeskouers die broodjie verslind het voordat hy klaar gemeet is.

Mnr. Parvin Shariati, een van die organiseerders van die geleentheid, hoop dat die broodjie die Guinness World Book of Records sal haal aangesien al die bandopnames wat vasgelê is aan hulle gestuur is.

Die stad van Teheran en die land se volstruisboere se doel was om volstruisvleis te bemark en 1 500 mense het twee dae geneem om die toebroodjie van 1,5 km voor te berei. Dit het 500 m se tafels geneem om die broodjie te dra en 700 kg volstruisvleis en dieselfde hoeveelheid hoendervleis is gebruik. Dit is tydens 'n voedselfees in Teheran se Mellat Park ten toon gestel.

Die skare sou wel toegelaat word om die smaaklike rekord te proe, maar terwyl beamptes die broodjie gemeet het om sy grootte te bevestig het die honger mense die happie verslind.

Iran is die derde grootse volstruisprodusent in die wêreld na Suid-Afrika en Sjina, maar hou vol dat hy 'n beter klimaat vir dié soort boerdery as sy teenstanders het.

Bron:

Scotsman.com

Metro.com

21 Oktober 2008