VPI: Groentepryse styg 78%

Terwyl die algemene verbruikersprysindeks (VPI) van Januarie 2008 tot Januarie 2009 met 8,1 % toegeneem het, het die VPI vir voedsel met 16,1 % gestyg.

Volgens die Nasionale Landbou Bemarkingsraad (NLBR) se kwartaallikse voedselprysmonitor is die styging van 16,1% in die VPI vir voedsel 1,0% laer as die 17,1% wat in Desember 2008 aangeteken is. Die algemene VPI vir Januarie is ook 1,4% laer as die 9,5% van Desember 2008.

Die NBLR reken ook dat die swak ekonomiese groei wêreldwyd algemene stygings in kommoditeitspryse aan bande sal lê. Pryse sal slegs gunstig reageer op gerugte van negatiewe voedselvoorraadvlakke. Dit is ook moontlik dat China se invoere kan taan, wat druk op pryse kan plaas. Daarby moet rekening gehou word met die droogtetoestande in Argentinië en Brasilië wat pryse weer kan ondersteun.

Kyk 'n mens na die jaar-op-jaarprysstygings het mielieprodukte met 8,59% gestyg terwyl koringprodukte met 29,51% duurder geword het. Sonneblomprodukte het nou wel met 'n allemintige 43,6% gestyg, maar dit is aansienlik laer as die prysstyging van 60,55% wat in November 2008 daaraan toegedig is. Die prys van suiwelprodukte het oor die verlsgtydperk gedaal met gemiddeld 0,46% terwyl vleis 7,88% duurder geword het vanaf Januarie 2008 tot Januarie 2009.

Die grootste prysstyging, naamlik dié 78,54% van vars groente, is volgens die NLBR aansienlik meer as die styging van 10,63% wat die voedselprysmonitor in November 2008 daaraan toegedig het.

Die NLBR sê dit is interessant dat die internasionale mielie- en koringpryse tussen Januarie 2008 en Januarie 2009 respektiewelik gedaal het met 13,18% en 31,94%.

3 Maart 2009