Vuurwapens bly wettig tot 2009

Mense wat tussen 1 Januarie en 31 Maart gebore is, het nou tyd tot 31 Maart vanjaar om hul lisensies ingevolge die Wet op die Beheer van Vuurwapens te hernu nadat mnr. Charles Nqakula, Minister van Veiligheid en Sekuriteit, het die afsnydatum vir die heruitreiking van vuurwapenlisensies met drie maande uitgestel het.

Politieke partye het dié stap verwelkom. Mnr. Roy Jankielsohn, DA-woordvoerder vir veiligheid en sekuriteit, sê dié stap gaan 'n mate van verligting bring by polisiekantore, maar nie die vele probleme rondom die nuwe wetgewing oplos nie.

Dit behels die onbekostigbaarheid van die lisensiëring, veral vir pensiontrekkers, gebrek aan geakkrediteerde opleidingsbeamptes in baie landelike gebiede asook die Polisie se gebrek aan vermoë om dié tydrowende, burokratiese proses af te handel. Dié party meen dit is onvermydelik dat die huidige vertragings 'n uitwerking op die volgende ronde van die SAPD se heruitreiking van lisensies sal hê.

Die DA het benadruk dat 'n eenvoudige oudit van lisensies, vuurwapens en (wapen) eienaars 'n alternatief sou wees wat meer koste bespaar as die huidige tydrowende administratiewe proses.

Mnr. Pieter Groenewald, die VF Plus se hoofwoordvoerder oor veiligheid en sekuriteit, verwelkom ook die uitstel van die oorspronklike afsnydatum. Dié party sê hy het ná raadpleging met Nqakula en die Nasionale Vervolgingsgesag bevestiging gekry dat die huidige gelisensieerde vuurwapens se lisensies wettig bly tot Junie 2009. Dit beteken dat alle lisensies vir vuurwapens ingevolge die ou Vuurwapenwet (1969) tot Junie 2009 wettig bly.

"Dit beteken dat as 'n vuurwapeneienaar met 'n wettige lisensie nie nou ingevolge die nuwe wet heraansoek doen nie, hy of sy nie vervolg kan word vir die besit van 'n onwettige vuurwapen nie.

''Verskeie advertensies asook polisiebeamptes het vuurwapeneienaars egter gedreig dat hulle onwettig in besit van 'n vuurwapen sou wees as hulle nie nou ingevolge die nuwe Vuurwapenwet om 'n lisensie heraansoek doen nie," het Groenewald gesê.

Die gepaardgaande waarskuwings dat mense tot 15 jaar tronkstraf opgelê sou word (as hulle nie nou heraansoek doen nie) het verwarring geskep en mense gëintimideer.

"Die VF Plus het die minister in die Parlement gewaarsku dat hy oorhaastig is met die implementering van die nuwe Vuurwapenwet. Ons het daarop gewys dat polisielede wat die lisensiëring van vuurwapens moet hanteer, nie behoorlik opgelei is nie en verkeerde inligting aan vuurwapeneienaars gee."

Groenewald sê die minister behoort die nuwe Vuurwapenwet na die Parlement terug te verwys vir behoorlike hersiening. Die VF Plus is steeds betrokke by die voorbereiding van 'n hofsaak teen die minister oor die nuwe wet.

13 Januarie 2006