Water: Skeer almal oor een kam

Die Departement van Waterwese doen niks aan erge watermisbruik deur mynbou-aksies nie, terwyl dreigemente rondgeslinger word teen boere wat glo "onwettige strukture" tot nadeel van waterbronne oprig, sê die TLU SA.

Die TLU SA het te velde getrek teen beskuldigings van die Departement van Waterwese wat boere uitsonder as sondaars wat water misbruik.

"Die departement ondersoek nie die volle oorsaak van watertekorte en besoedeling nie," het mnr. Louis Meintjes, voorsitter van die TLU SA Sentraal se eiendomsregkomitee, gesê.

Hy sê ten spyte van klagte is daar geen optrede van die staat se kant af teen die besoedeling en vernietiging van vleilande, verlegging van strome en riviere en onwettige onttrekking en opgaar van water deur mynbou — veral sandmyners — nie. Daar is ook geen beheer oor onoordeelkundige goedkeuring van ontwikkeling in landelike gebiede en gebrekkige rioolwerke nie.

"Die staat moet eenvormig optree en die kern van probleme probeer oplos."

By navraag het 'n amptenaar van die Departement van Waterwese die TLU SA gelyk gegee dat boere ten onregte uitgesonder word as oortreders, terwyl munisipaliteite en myne ewe aandadig is aan watermisbruik.

Volgens hom moet die probleem van misbruik deur mynbou-aksies voor die deur van die Departement van Minerale en Energie gelê word wat "links en regs mynpermitte uitreik sonder om te kyk na impakstudies en dan ander departemente, soos dié van Waterwese en van Omgewingsake, met die gebakte pere laat".

Die Departement van Minerale en Energie het nie op 'n navraag gereageer nie.

Landbouweekblad, 11 Mei 2007