Droogteramp in die Kaap

Droogte. Foto: www.earthclinic.com

Die huidige droogte, wat dele van die Wes-Kaap lamlê, is ’n “volskaalse ramp”, sê mnr. Anton Bredell Wes-Kaapse minister van plaaslike bestuur, omgewingsake en ontwikkelingsbeplanning. Die Eden-distrik in die Suid-Kaap trek besonder swaar en Bredell sê die plaaslike regering kan nie dié situasie self behartig nie, luidens ’n berig op News24.com.

“Die rede waarom ons dié roete kies, is om te verseker dat vroeg genoeg ingegryp kan word. Ons moet voorkom dat George, Knysna en Mosselbaai se water opraak. Ons is veral begaan oor George. As die omgewing tot rampgebied verklaar word, kan ons intree en dalk selfs nasionale finansiering kry,” sê hy.

Die nasionale Regering en die Departement van Waterwese en Omgewingsake het reeds hulp verleen en Bredell het ’n brief aan munisipaliteite in dié omgewing gerig waarin hy versoek dat hulle waterverbruik met 30% inkort.

“Weerberigte voorspel droë toestande, ondergemiddelde reënval, hoë temperature en sterk winde.”

Bron:
News24.com

5 November 2009