Goeie reën val in winterstreek

Die winderige reënweer verlede week in die Kaap het min dele van dié winterreënstreek oorgeslaan.

Teen druktyd het dit reeds meer as 120 mm teen die berg by Piketberg en in die omgewing van Kamieskroon in die Noord-Kaap gereën. Verder suid, by Garies, berig me. Karin Engelbrecht van die plaas Bruinkop dat daar tussen 32 mm en 75 mm reën aangeteken is.

Hoewel hulle meer reën sal verwelkom, is landboutoestande in die Suid-Kaap aansienlik beter as in die ooreenstemmende tyd verlede jaar, sê boere in dié gebied. Mnr. Jacobus Human van die plaas Eerstekop, Heidelberg, het teen druktyd 15 mm reën gehad en die vooruitsigte vir nog buie
was goed.

Mnr. Tienie Theunissen wat op Drayton naby Caledon boer, het 28 mm gemeet. Hy sê die verspreiding van die reën is goed. “Ons het amper elke naweek ’n bietjie reën gekry. Die koue wat ons nou kry, sal help dat die koringplante stoel.”

Ook in die Swartland wat tot dusver goed reën kry, is goeie reënvalsyfers aangeteken. By mnr. Cobus Bester van Uitkyk, Moorreesburg, het dit 38 mm gereën. Mnr. Dirk Lesch, wat in die Riebeekvallei boer, het 27 mm reën gekry.

Hulle het nie reënmeters nie, maar die kommunale boerderygebiede Richtersveld en Steinkopf in die Noord-Kaap het ook goed reën gekry, sê mnre. Gert Opperman van Port Nolloth en Ranald Balie van Steinkopf. Hulle is dankbaar vir die reën, maar die groot versugting bly dat dit op hul eie grond sal val.

Lees meer in Landbouweekblad se uitgawe van 3 Julie 2009.

29 Junie 2009