Graanboere hou asem op oor reën

Nat plaaspad in die Vrystaat. Foto: LBW

Graanboere hou asem op vir mielie-oeste en koring-aanplantings nadat baie reën voorspel is.

Mnr. Neels Ferreira, voorsitter van Graan SA, sê ‘n mooi mielie-oes staan tans op die lande, maar dit sal slegs ‘n groot en goeie oes wees as boere dié graan kan stroop.

Hy sê die weerburo se voorspelling van tot 80% reën in die binneland vir vandeesweek is ongunstig vir die mielie-oes. “Dit is ‘n abnormale tyd vir reën, hoewel ons nie verwag dat dit die gehalte van die mielies gaan raak nie.”

Volgens Ferreira is aanvanklik verwag dat die mielie-oes vanjaar stadiger as gewoonlik gaan inkom. Hy sê volgens voorspellings behoort dit nie ernstige gevolge vir die mark in te hou nie, hoewel dit tot ‘n styging in die kontantmark kan lei.

Val vas in nat lande
Mnr. Dirk Viljoen, hoof van die Bethlehem-boerevereniging, sê frustrasies loop hoog omdat die lande té nat is om mielies te oes. “Boere kom net ‘n entjie ver, dan staan hulle weer in die nat lande.”

Intussen sê mnr. Andries Theron, ondervoorsitter van Graan SA, hy is bekommerd oor die invloed wat reën in die binneland op koring-aanplantings in die sentrale en noordelike dele gaan hê. “In baie gebiede, soos Bothaville, Bultfontein en in die Bethlehem-distrik, het die grond reeds sy versadigingsvlak bereik.”

Theron sê die reën is nie goeie nuus vir koringboere in dié distrikte nie. “Daar is baie boere wat sukkel om in hulle lande te kom en hulle moet nou plant.”

Wat aanplantings in die Suide aanbetref, sê Theron baie meer reën nou sal nie noodwendig goeie gevolge vir dié aanplantings inhou nie. 

Die weerkantoor voorspel kanse van tot 80% vir reën in die binneland die week.

7 Junie 2011