Koue: Van Overberg tot in Namibië

Reën: Foto: LBW

Goeie reën, gepaard met ysige weer, het verlede week in die Overberg voorgekom, terwyl mense in die suide van Namibië die komberse moes uithaal.

Die Overberg Distrikslandbouvereniging sê dié gebied het die afgelope week ysige en nat weer beleef.

Volgens ’n opname onder sy lede op 15 Julie gedoen is, is gemiddeld van 25 mm tot 40 mm reën gemeet. Geen skade is aangemeld nie.

In die Riviersonderend-gebied het sneeu op die berge geval. In die Ouplaas-, Rûens- en Riviersonderend-streke het ryp voorgekom.

Goeie nuus vir vrugteboere
Die koue weer is goeie nuus vir die vrugte- en wingerdprodusente in die Greyton- en Babilonstoring-distrikte aangesien dit ‘n goeie botpersentasie in die komende seisoen tot gevolg behoort te hê.

Graanboere in die streek het genoem dat hulle verheug is oor die reën en dit as “manna uit die hemel” beskryf. Veeprodusente van Riviersonderend is bekommerd oor die weidings wat “agter” is en dat hulle steeds ekstra voer moe aankoop.

Hoewel goeie reëns vroeër dié seisoen geval het, het die persentasie grondvog die afgelope paar weke weer begin daal en was ‘n goeie bui reën broodnodig. ‘n Produsent in die Bredasdorp-omgewing het laat weet dat sy graangewasse dit nie sou oorleef het indien dit nie betyds gereën het nie.

In Namibië is ook erge koue weer ondervind, aldus die webwerf van Die  Republikein.

19 Julie 2010