Slegte weer pla in Kaapse oestyd

koring platsny. Foto: ROGER SEDRES, Media24

Reën en stormsterk suidoostewinde ry Suid-Kaapse graanboere se oesplanne kwaai in die wiele.

Hoewel boere in die Riversdal-omgewing se oeste al ingesamel is, is daar boere by Riviersonderend wat skaars begin het. Mnr. Kobus Horne van Pienaarsrivier, Riversdal, het “gedruk” om klaar te oes voor einde Oktober se groot reën (42 mm) en sterk wind, en hoewel die oes nie so goed soos verlede jaar is nie, is hy tevrede met die sowat 2,7 t/ha koring, 3,1 t/ha en 1,3 t/ha kanola wat hy vanjaar geoes het.

Buite Riviersonderend het mnr. Wessel-Jan van Deventer nog net een dag geoes. “Hier staan ‘n vreeslike goeie oes op die lande, so ons is taamlik bekommerd oor die reën.” Die groot probleem is by die platgesnyde gars wat dalk kan uitloop en nie aan vermoutingstandaarde voldoen nie.

Mnr. Jannie Baard van Parklands, Witsand, het begin Oktober 83 mm en nou 70 mm reën gekry.
Hy het redelik windskade op sy kanola gekry, maar sien uit na ‘n goeie koringoes.

Mnr. Jacobus Human van Eerstekop, Heidelberg, sê met die meer as 130 mm reën wat hulle in twee sarsies in Oktober gekry het, groei die lusern mooi, en is daar vog in die grond wat tot voordeel van volgende jaar se oes sal wees.

28 Oktober 2009