Warm somer aan die kom

Foto: AMELIA GENIS

Die komende somer gaan warmer as gewoonlik wees met minder reën vir boere in somerreëngebiede, luidens die Departement van Landbou, Bosbou en Visserye se klimaatsvooruitskouing. Boere word gewaarsku om die komende somer met omsigtigheid te benader.

Droëland-boere word aangeraai om vroeg te plant en vinniggroeiende kultivars te gebruik. Die getal lewende hawe behoort volgens die beskikbare weiding aangepas te word. Die winter is deur normale tot bo-normale reënval in die meeste dele van die land gekenmerk, behalwe in Limpopo en die Oos-Kaap, waar droogte steeds ’n probleem is.

Damme is oor die algemeen meer as 70 % vol, behalwe in die oostelike dele van die Wes-Kaap, die Oos-Kaap en Limpopo, waar damme leër is. Die verwagte warm, droë weer vererger die gevaar van wegholverldbrande en boere word gemaan om te verseker dat hulle aan die Regering se maatreëls oor dié kwessie gehoor sal gee.

21 September 2009