Wat sê die weer?

Die winter is hier en die Departement van Landbou, Bosbou en Visserye verwag bogemiddelde reënval in die Wes- en Oos-Kaap, die Vrystaat en KwaZulu-Natal. Die westelike deel van die Wes-Kaap behoort gedurende die volgende twee weke baie reën te kry, maar die verwagting is dat dié streek op lang termyn minder reën sal kry as verlede jaar.

Ander winterreëngebiede sal na verwagting bogemiddelde reën kry, terwyl minimum temperature warmer as gewoonlik behoort te wees. Luidens 'n mediaverklaring van die departement is damvlakke ongeveer dieselfde as verlede jaar hierdie tyd, behalwe in die Oos- en Wes-Kaap waar die damme leër is.

Die risiko vir veldbrande in somerreëngebiede is hoog en die departement waarsku dat ryp en sneeu in dele van die land verwag kan word. Besoek die Departement van Landbou, Bosbou en Visserye se webwerf vir die volledige weerverslag.

27 Mei 2009