Weerstoestande gaan na verwagting oor die volgende twee weke in die sentrale dele van die land herstel, en “plantreën” sal moontlik in die somersaaigebiede begin val.

Mnr. Johan van den Berg, klimatoloog van Santam Agri, sê dit is nie ongewoon dat reën in Noordwes, die Vrystaat en die Noord-Kaap eers in die laaste week van Oktober of die eerste weke van November voorkom nie.

“Dit is nog nie te laat vir boere wat wil plant nie, maar dit is so dat grondvog in dele bitter skraps is, en dus is reën vir veral weiding nou baie belangrik,” verduidelik Van den Berg.

Intussen blyk dit dat die El Niño-verskynsel wat vroeër vir dié somerseisoen voorspel is - en tot ’n mate voorgekom het - verswak. Van den Berg verwag dat weerstoestande binne die volgende maande “meer neutraal” gaan word.

Suid-Kaap kry somerweer
Vir boere in die Suid-Kaap voorspel Van den Berg ’n tipiese somerweerstelsel. “Daar behoort oor die volgende maand meer tipiese somerreën voor te kom, wat beteken dat minder reën in die suid-oostelike dele sal val.”

Die Oos- en Suid-Kaap is onlangs getref deur swaar reën wat nie net infrastruktuurskade veroorsaak het nie, maar wat boere verhoed om die oeste wat tans op die lande staan, af te haal.

Groot kommer bestaan onder boere in die Suid-Kaap, spesifiek naby Riversdal, Swellendam en Riviersonderend, vertel mnr. Andries Theron, ondervoorsitter van Graan SA. Hy sê boere wat kanola, gars en koring geplant het, sou tans “vol aan die stroop gewees het” sou dit nie gereën het nie.

Theron het die gebied Woensdag, 24 Oktober, besoek en sê groot kommer bestaan omdat boere verwag dat hulle eers oor ’n week in landerye sal kan kom om te begin stroop. “Die presiese skade aan die oeste sal ons eers kan vasstel wanneer die oesproses kan begin.”