Werkers lede van tafeldruif-liggaam

Die Hexvallei Tafeldruifassosiasie (HTA) het op sy onlangse jaarvergadering in De Doorns die eerste keer plaaswerkers as lede aanvaar.

Mnr. Cobus Dowry, die Wes-Kaapse minister van landbou, het op die vergadering gesê 'n atmosfeer van samewerking tussen belanghebbendes in die landbou is oral in die provinsie te sien.

Volgens hom wag daar nogtans talle uitdagings op die landbou. Een daarvan is die verbetering van plaaswerkers se lewensgehalte en die regstel van die wanindruk dat boere nie omgee vir hul werkers nie. Waar daar wél verhoudingsprobleme bestaan, moet dit reggemaak word.

Hy het opleiding uitgelig as een van sy departement se vernaamste instrumente om werkers te bemagtig. Die desentralisering van opleidingsgeriewe om mense op die platteland beter toegang tot opleiding te gee, is 'n belangrike element daarvan.

Die nuwe lede van die HTA is mnr. Chris en me. Florida Pretorius, mnr. Christopher en me. Marlene Swanepoel, mnr. Anthonie Visagie, mnr. André Thops, mnr. Emile Asplein, mnr. Abraham Andrews, mnr. Kobus van der Horst, me. Deidre Malgas, mnr. André Plaatjies en me. Magdalena Ruiters.

Al dié persone het uitgeblink in die HTA se Plaaswerker van die Jaar-kompetisie wat sedert 2002 aangebied word.

Van der Horst sê dit is vir hom 'n groot oomblik om ná jare in die landbou formeel daarby ingesluit te word. Hy glo die nuwe lede het besondere kennis wat hulle met ander kan uitruil.

''Daar ís verandering in die landbou en ons moet almal bereid wees om vorentoe te gaan. Wat ons nóú begin, sal vir die volgende geslag 'n inspirasie wees,'' sê hy.

8 Oktober 2004