Wol SA wil heffings keer

Die bestuur van Wol SA het eenparig besluit om regstappe te doen om 'n stokkie voor die instelling van 'n statutêre heffing op rooivleis te probeer steek. Wol SA het 'n paar jaar gelede 'n prominente rol gespeel in die stryd om statutêre heffings op wol uiteindelik afgeskaf te kry.

Luidens 'n verklaring is die instelling van die vleisheffing aanvanklik deur die Nasionale Landboubemarkingsraad afgekeur, maar uiteindelik gekwalifiseerd by die Minister van Landbou aanbeveel. Daar word beoog om die heffing op 1 Januarie aanstaande jaar in te stel.

Wol SA meen dat die proses wat gevolg is, nie behoorlik aan die regsvoorskrifte voldoen het nie en dat alle betrokkenes op alle vlakke nie behoorlik geraadpleeg is nie. Volgens Wol SA is talle boere en ander instellings wat verplig gaan word om die vleisheffing te betaal, nog nie behoorlik oor die uitwerking daarvan ingelig nie. Dit is nog onbekend hoeveel die heffing presies sal bedra. Dit sal vir vier jaar geld.

Wol SA het opdrag aan sy regsverteenwoordiger, mnr. Dawie Visser van M.D. Visser & Vennote, gegee om die nodige regstappe te doen. Wol SA het 'n spesiale fonds gestig om voorsiening te maak vir die regskoste. Hy sal sy lede versoek om vrywillige bydraes tot die fonds te maak.

Intussen het die bestuur van Wol SA hom verbind tot die suksesvolle afhandeling van swart bemagtiging in die landbou. Die organisasie is bekommerd oor die verloop van die onderhandelingsproses.

Hoewel Wol SA die proses sal monitor, het hy kennis gegee van sy vaste voorneme om, indien nodig, ook gepaste regshulp te kry om te verhoed dat die proses ontspoor. Wol SA meen dat sekere van die Agri-SEB-aansprake op onteiening neerkom en niks met swart bemagtiging te doen het nie.

In dieselfde asem waarsku Wol SA sy lede teen sekere organisasies en konsultante wat die huidige onsekerheid uitbuit deur voor te gee dat hulle boere met die implementering van sogenaamde Agri-SEB-programme kan bystaan. Daar bestaan tans geen riglyne vir sodanige programme nie en in die proses mislei konsultante boere vir hul eie finansiële gewin.

5 November 2004