Wol SA wil 'provinsie' van NWKV word

Die tyd is reg vir Wol SA om 'n "provinsie" van die Nasionale Wolkwekersvereniging (NWKV) te word, het mnr. Richard Glennie van Somerset-Oos op die jaarvergadering van dié organisasie gesê.

Hy meen dit is nodig om met die NWKV te praat om 'n werkbare stelsel vir almal te kry.

"Dit is in alle wolboere se belang om saam te werk en gemeenskaplike grond te kry. Dit is nodig om die NWKV se vergaderings by te woon as lid van WSA en meer betrokke te raak."

Mnr. Pikkie van den Heever van Richmond sê dit is goed om met die NWKV te praat. "Wol SA sal nie sy individualiteit daarmee prysgee nie."

Hy sal graag met die nuwe voorsitter van die NWKV oor onder meer generiese reklame gesels. Heelwat inligting kan uitgeruil word.

1 Julie 2005