Wolbevordering kry groen lig

Afgevaardigdes op die kongres van die NWKV in Port Elizabeth het 'n voorstel eenparig gesteun dat wol plaaslik en internasionaal bevorder sal word en dat die nodige geld daarvoor gevind moet word.

Die Wolforum gaan versoek word dat die Woltrust geld vir dié doel beskikbaar stel. Die Departement van Handel en Nywerheid gaan ook gevra word om 'n bydrae te lewer om in besonder die Suid-Afrikaanse skeersel te bevorder. As die geld egter nie verkry kan word nie, sal die Suid-Afrikaanse Wol- en Bokhaarvereniging (Sawamba) gevra word om sy vrywillige heffing van 2c/kg te verhoog.

'n Verwante besprekingspunt is ook gesteun, naamlik dat die Wolforum vir Cape Wools opdrag gee om met die bystand van die Departement van Handel en Nywerheid wol plaaslik te bevorder en bewustheid vir die vesel te verhoog.

Mnr. Hendrik van Zyl, voorsitter van Cape Wools, hoop dat die binnelandse bevordering van wol nie oor die hoof gesien sal word nie. Mnr. Laurence Modiano, 'n Italiaanse wolkoper, meen egter dat die geld eerder in die buiteland aangewend behoort te word. Hy twyfel of Suid-Afrika veel welslae sal hê om sy skeersel in die buiteland te bemark. "Suid-Afrika behoort eerder sy kragte saam met dié van Australië te voeg."

Om werklik 'n impak te maak, meen hy die Suid-Afrikaanse bydrae tot wolbevordering behoort ongeveer $15 miljoen (sowat R100 miljoen) te wees.

Mnr. Peter Kingwill, 'n oud raadslid van die Internasionale Wolsekretariaat en ere-ondervoorsitter van die NWKV, sê dit is belangrik dat Suid-Afrika die voortreflikhede van sy skeersel aan die wêreld voorhou en Australië nie die geleentheid bied om net sy skeersel te bemark nie. Hy stel voor dat daar eers 'n ondersoek gedoen word oor wat bereik wil word en hoeveel geld nodig is, vóór geld vir bevordering blindelings bewillig word. "Die kernvraag bly in water mate geld wat op die bevordering van wol bestee word, meer geld in die wolboer se sak gaan bring."

Mnr. Harry Prinsloo, ondervoorsitter van die NWKV, het benadruk dat die hele bedryf die aanbevelings moet steun. Mnr. Ben Brynard van die Noord-Kaap meen dat die rente op die geld wat uit die Wolmerk-geding gemaak is, vir dié doel gebruik behoort te word.

Die kongres het besluit om aan te beveel dat Suid-Afrikaanse wol in die toekoms verkieslik net in nylonsakke verpak sal word.

9 Junie 2006