Wolboere huiwerig oor bemarkingsprogram

Die moontlike deelname van die Nasionale Wolkwekersvereniging (NWKV) aan 'n internasionale program vir die generiese bemarking van wol het 'n ja-stem gekry op die Vrystaatse NWKV se kongres. Van die lede was egter baie huiwerig oor die wenslikheid van deelname.

Mnr. Petrus de Wet, voorsitter van die nasionale organisasie, het op die kongres gesê die internasionale bemarking van wol is noodsaaklik, "soos deur die Test Marketing Program (TMP) bewys is". Hy sê dit sal vir die Suid-Afrikaanse wolbedryf die moeite werd wees om aan die program deel te neem. Die uitslag van 'n oudit oor die TMP word eersdaags bekend gemaak.

De Wet sê die verskillende provinsies se steun word gevra sodat hy en mnr. Harry Prinsloo, ondervoorsitter van die NWKV, 'n mandaat het om namens die bedryf te onderhandel. Die finale besluit oor die deelname aan die TMP sal op die nasionale kongres in Mei geneem word.

Daarvoor is egter geld nodig. Op 'n vergadering in China is besluit op 'n vrywillige bydrae van 0,5 % tot 1 %. Vir Suid-Afrikaanse boere beteken dit sowat 20c/kg. Dit is egter nog net 'n voorstel, maar volgens De Wet is dit "nie te veel om in 'n mens se toekoms te belê nie". Hy sê dit is beter om te betaal en in beheer te bly van die bemarking van die produk.

Hy wil nie die heffingsroete loop nie, "want dan het iemand anders beheer oor jou produk". Die beste manier om dit te finansier, is deur vrywillige bydraes in die vorm van invordering deur die Wol- en Bokhaarkopersvereniging (Sawamba). Hy het beswaarmakers gerusgestel dat die geld deur die Wool Textile Council bestuur en net vir die TMP gebruik sal word.

Prinsloo sê dit is 'n poging om die Suid-Afrikaanse skeersel weer sy plek in die wêreldmark te laat inneem as skoon wol van gehalte. Dit is belangrik dat Suid-Afrika wêreldwyd as wolproduserende land gesien en erken word.

Landbouweekblad, 16 Maart 2007