Wolmark stabiel

Mnr. Jan Randell (tweede van links) van Lothair in die Ermelo-distrik het onlangs 761 bale wol met 'n massa van 113 ton aan BKB in Durban gelewer. Hy is Suid-Afrika se grootste wolboer. Op die foto is van links mnre. Bennie Steyn (links) BKB skaap-en wolbeampte, Randell, Derek Fitzhenry, BKB se bestuurder: Wolverhandeling in Durban en Basie Claassen, BKB bestuurder: Wolverhandeling in Port Elizabeth.
Foto: Ona Viljoen

Die wolmark het op vandag se veiling, die voorlaaste van die seisoen, gestabiliseer nadat dit die afgelope twee veilings skerp gedaal het en Cape Wools se Merino-aanwyser het onveranderd op R61,50/kg (skoon) gesluit.

Dit kan in 'n mate aan die swakker rand toegeskryf word wat sedert die vorige veiling twee weke gelede met 1,2% teenoor die Amerikaanse dollar en met 3% teenoor die euro verswak het.

Pryse het baie gewissel en sommige tipes was tot 4,5% duurder, terwyl ander tipes baie goedkoper was. Kortwolpryse het egter heelwat teruggesak.

Te oordeel aan wolontvangste by makelaars se pakhuise lyk dit asof produksie dié seisoen weer 'n styging gaan toon. Die volume wol wat tot nou ontvang is, is 3,6% hoër vergeleke met die ooreenstemmende tydperk die vorige seisoen. Produksie het verlede seisoen met 2,2% gestyg.

Gemiddelde prysbewegings van AWEX-tipes MF4 en MF5 van 70 mm en 80 mm was soos volg: 20 mikron was 1,5% goedkoper op R68,13/kg; 21 mikron verswak met 0,6% tot R63,26/kg; 22 mikron daal met 1% tot R59,97/kg en 23 mikron verswak met 2,1% tot R57,66/kg. Daar was geen kwotasies vir 19 mikron, 24 mikron en 25 mikron weens die beperkte aanbod in dié kategorieë.

Die laaste veiling van die seisoen vind op 11 Junie plaas wanneer sowat 12 500 bale aangebied sal word.

28 Mei 2008