Wolmark sukkel

Die wolmark sukkel om die mas op te kom in die huidige bedrukte vraagtoestande en Cape Wool se markaanwyser het verlede week met 0,4 % teruggesak om op R24/kg (skoonwol) te sluit.

Selfs nie eens die swakker rand kon help om pryse 'n hupstoot te gee nie. Die pryse vir langwol het gewissel. Sommige soorte se pryse is effens hoër, terwyl ander weer teruggesak het.

Die gemiddelde skoonwolpryse vir goeie, lang Merinovagwol (spinners- en goeie kambolsoorte, 75 mm tot 95 mm) was soos volg: 19 mikron sluit 2,3 % laer op R37,71/kg, daar was geen kwotasies vir 20 mikron nie, 21 mikron styg met 1 % tot R32,41/kg, 22 mikron versterk met 0,4 % tot R31,44/kg, 23 mikron sak effens met 0,2 % tot R30,86/kg, 24 mikron styg met 0,7 % tot R30,36/kg en 25 mikron sak met 3,5 % terug tot R28,61/kg.

Sowat 9 000 bale sal vandeesweek aangebied word.

11 November 2005