Wolprys is op loop!

Die swakker rand het die wolmark op dié week se veiling ondersteun en Cape Wools se Merino-aanwyser met 2,6% tot R69,95/kg (skoonwol) laat styg, wat die hoogste vlak vir die seisoen is.

Dit beteken dat die aanwyser nou 25% hoër as die openingsvlak en 34% bokant dieselfde veiling verlede seisoen is.

Die rand het die afgelope week kwaai wipplank gery en in 'n stadium tot sy swakste vlak in vyf jaar teenoor die Amerikaanse dollar verswak.

Dit het sedertdien ietwat versterk, maar het steeds 4,5% swakker teen die Amerikaanse geldeenheid verhandel vergeleke met verlede week. Dit was ook aanmerklik swakker teenoor die euro.

Fynwol, (19 mikron) het die grootste styging aangeteken, terwyl die meeste ander langwoltipes met tussen 2% en 3% verbeter het.

Dit was 'n redelike groot veiling met 11 225 bale waarvan 97% verkoop is. Die vetwoluitvoeders Standard Wool en Modiano het die veiling oorheers en meer as die helte van die aanbieding gekoop.

Gemiddelde prysbewegings van AWEX-tipes, MF4 en MF5 van 70 mm en 80 mm was soos volg: 19 mikron styg met 5,1% tot R88,07/kg; 20 mikron was 1,6% duurder op R77,35/kg, 21 mikron verstewig met 3,3% tot R71,18/kg, 22 mikron was 2,3% duurder op R69,76/kg en 23 mikron styg met 2,6% tot R67,14/kg. Daar was geen kwotasies vir 24 mikron en 25 mikron in dié bepaalde tipes nie.

Sowat 11 000 bale sal volgende week aangebied word.

5 Maart 2008