Wolskaap onttroon donkie!

Die wolskaap het die donkie as die wonderlikste ding onttroon. Altans, dit is as 'n mens luister na wat mnr. Geoff Kingwill, voorsitter van Cape Wools, oor die skaap te sê het.

Die ou liedjie besing die donkie as 'n wonderlike ding wat allerhande dinge kan aanvang waartoe g'n ander dier in staat is nie.

Kingwill het wol se goeie hoedanighede op die NWKV se streekvergaderings in KwaZulu-Natal besing: Dit haal asem, isoleer en absorbeer reuke en water, is elasties, het brandweerstand en beskik oor uitstekende eienskappe vir hantering en drapering.

Wolboere is bewus van hierdie goeie eienskappe, maar die verbruiker weet dit nie noodwendig nie; veral nie jonger mense nie. Sommige mense dink nog aan wolkledingstukke as iets wat 'n mens laat jeuk.

Daarom beywer Cape Wools hom sterk vir wol en het hy sy eie veldtog om die wolskeersel internasionaal te bemark, terwyl Suid-Afrika ook met die Australiërs saamwerk om wolprodukte en die Merino te bevorder. Dit word uit die heffing van 10 sent/kg wol gefinansier wat produsente betaal.

Hy sê Cape Wools beywer hom sterk vir tegnologie-oordrag, met die belangrike doel om boerdery met wolskape meer winsgewend te maak. Geld word ook vir navorsing en ontwikkeling geoormerk.

Plaaslike wol het 'n goeie naam vir gehalte, maar produsente moet gedurig daaroor waak omdat die buitelandse kopers geen besoedeling duld nie. Dit is hoekom Suid-Afrika daarna streef om teen volgende seisoen alle wol slegs in nylonsakke te verpak om die moontlikheid vir besoedeling te verminder.

Landbouweekblad, 22 Februarie 2008