Wynbedryf wil ekologie beskerm

Die Suid-Afrikaanse wynbedryf en Wes-Kaapse en internasionale bewaringsorganisasies het 'n projek begin om moontlike skade aan ekologies-sensitiewe gebiede deur die snelle uitbreiding van wingerde te verhoed.

'n Skerp toename in wynuitvoer en die gepaardgaande groei in die wynbedryf die afgelope dekade het kommer in bewarings- en wynkringe laat ontstaan dat sekere van die sensitiefste natuurlike habitats in die streek vir wingerduitbreiding gebruik gaan word.

Die Biodiversiteit- en Wyninisiatief poog om die uitwerking van die wynbedryf op die omgewing te versag en kan die Suid-Afrikaanse wynbedryf in 'n voorbeeld vir ander lande se wynbedrywe verander.

Volgens dr. Johan van Rooyen, uitvoerende hoof van die Suid-Afrikaanse Wyn- en Brandewynmaatskappy (SAWB), moet die groei en uitbreiding van die plaaslike wynbedryf, wat grootliks in die Wes-Kaap gesetel is, nie tot nadeel van die natuurlike rykdom van die streek wees nie.

"Die Kaapse blommeryk is vanweë sy biologiese verskeidenheid van internasionale belang en is onlangs tot 'n Wêreld-erfenisgebied verklaar. Dit is egter ook die streek in Suid-Afrika wat die geskikste is vir wynboerdery."

Sowat 90 % van die land se wyn word op sowat 95 000 hektaar onder wingerd geproduseer.

Van Rooyen sê die ontwikkeling van wingerde het grootliks onbeheer en teen 'n snelle pas plaasgevind. Hoewel "betreklik min" gedoen is om 'n wynboerdery te skep wat in harmonie met die omgewing is, sê hy is daar tot dusver nie tekens van groot skade gevind in ondersoeke wat in opdrag van die SAWB onder die wynbedryf se Geïntegreerde Wynproduksieprogram uitgevoer is nie.

"Die Biodiversiteit- en Wyninisiatief sal egter toekomstige skade help voorkom deur wingerde te skep wat nie inbreuk maak op die natuur nie, maar 'n integrale deel daarvan is."

Van Rooyen sê die wynbedryf se verbintenis tot bewaring en omgewingsvriendelike praktyke sal die bedryf help in sy strewe om 'n groter markaandeel in internasionale markte te kry. "Omgewingsvriendelike produksie, tesame met gehaltebeheer en besorgheid oor die etiese aspekte van produksie, is die primêre beweegrede van wynkopers in Europa en Amerika.'