Wynstok-kultivars: Wyer keuse

Suid-Afrikaanse wynboere sal moontlik binnekort wyn uit 'n groter
verskeidenheid druifsoorte produseer. Dit is omdat die Departement
van Landbou wysigings aan die Wet op Drankprodukte
wil maak - onder meer dat weggedoen word met die bepaling dat
wyn nét van 'n sekere wingerdstok gemaak mag word.

Tegnies mag wyn net gemaak word van die kultivars van Vitis-vinifera
wat geselekteer is vir die bereiding van gehaltewyn. Internasionaal
is dit egter nie meer 'n vereiste nie. As net die genus vitus
gebruik word, is daar 'n groter verskeidenheid wingerdstokke
wat gebruik kan word om wyndruiwe te produseer.

Die wysigings aan die voorgestelde Wetsontwerp op Drankprodukte
is egter nog nie aanvaar nie en 'n wynbemagtigingsprojek
in die Noord-Kaap kan as gevolg daarvan in duie stort.

Me. Wendy Jonker, assistent-direkteur vir drankprodukte by
die departement, sê 'n projek vir opkomende boere in die Noord-
Kaap en Vrystaat is begin om distilleerwyn te maak. Jonker sê die
boere is op die punt om wyn te maak, maar omdat daar ingevolge
die wet beperkings is - soos dat slegs Vitis-vinifera gebruik kan
word - kan hulle niks doen nie.

Jonker sê tans word alle distilleerwyn ingevoer. Die idee is dat
die groter produsente in die land wat spiritualieë nodig het, dit
van die opkomende boere bekom.

Landbouweekblad, 6 Junie 2008