Xingwana 'kan haar man staan'

Me. Lulu Xingwana, aangewese Minister van Landbou en Grondsake, het die nodige vermoë om die landbousektor tot groter hoogtes te neem, meen me. Thoko Didiza, nuwe Minister van Openbare Werke.

Xingwana het haar toetrede tot dié portefeulje as 'n "groot uitdaging"aan Landbouweekblad beskryf.

Xingwana het vlugtig met die tydskrif ná 'n begrotingsdebat in die Parlement gepraat en gesê dat sy nog nie 'n kans gehad het om belanghebbendes in die landbou te ontmoet nie.

"My fokus is tans nog op die Departement van Minerale en Energie waar ek my werksaamhede afhandel," het sy gesê.

Xingwana word onder meer as 'n vuurvreter beskryf en is ook daarvoor bekend dat sy uit die heup skiet oor sake van belang.

Dr. Kraai Van Niekerk, DA-woordvoerder vir landbou en grondsake, het haar in sy verwelkomingsboodskap gewaarsku dat sy in dié portefeulje sal moet dink voor sy praat.

"Ons wens haar alle sterkte toe en vertrou dat sy aandag sal gee aan die enorme uitdagings met betrekking tot die welvaart van boere en bespoediging van grondhervorming".

"Sy sal egter versigtig moet wees om nie opspraakwekkende stellings, soos in die verlede toe sy groot maatskappye aangeval het en opmerkings oor vreemdelingehaat in die Nasionale Vergadering gemaak het, moet herhaal nie," het hy gesê.

Xingwana het verlede jaar opslae gemaak toe sy Sasol, De Beers en Anglo daarvan be-skuldig het dat hulle nie swart bemagtiging en transformasie genoeg bevorder nie. Haar aanvalle op "ryk wit kartelle" wat die "mynbedryf monopoliseer" en die land se "diamante stroop" het ook wenkbroue gelig.

Xingwana (51) is in 2004 in die portefeulje van Adjunkminister van Minerale en Energie aangestel ná tien jaar as parlementslid.

In dié tyd was sy vyf jaar lank voorsitter van die parlementêre sportkomitee.

Sy is in Mqanduli in die Oos-Kaap gebore en het in 1985 die graad B.Sc. aan die Universiteit van die Witwatersrand verwerf. Dit is gevolg deur nagraadse diplomas in Harare in 1988 en Londen in 2002.

Afgesien van 'n verskeidenheid parlementêre komitees waarin sy al gedien het, is Xingwana ook 'n lid van die ANC se nasionale uitvoerende komitee (NUK) en vroueliga.

(Lees nog berigte op bls. 64 en 65.)

2 Junie 2006