Zille soek goeie verhouding met boere

Gewelddadige aanvalle teen boere en veediefstal hou 'n groot gevaar vir die landbou in Kaapstad in, het me. Helen Zille, burgemeester van dié stad, aan Landbouweekblad gesê. Volgens haar word die metropolisie oor die volgende drie jaar uitgebrei en behoort die boerderygebiede ook daaruit voordeel te trek.

Sy sê boere betaal 'n klomp belasting, maar ontvang bitter min dienste in ruil daarvoor. Volgens haar sal die stadsraad na maniere kyk om die landbousektor tegemoet te kom, maar sy wil nie spesifieke beloftes maak nie.

Op 'n vergadering van die landbouvereniging Philadelphia het Zille gesê die nuwe regering van die Stad Kaapstad werk goed met die sakesektor saam en wil die landbou ook graag as 'n vennoot hê. Sy het die boeregemeenskap as die stad se oudste gemeenskap bestempel en boere bedank vir hul bydrae tot die stad en die land se ekonomie.

Volgens haar wil die stadsraad die vrye mark op alle gebiede laat werk. Dit moet ook in die armes se behoeftes voorsien. Die Wes-Kaapse regering en die stadsraad streef na 'n ekonomiese groeikoers van 8 % per jaar in Kaapstad.

Zille sê die gebrek aan kundige personeel is een van haar regering se grootste uitdagings. Die vorige stadsraad het van talle kenners ontslae geraak ter wille van transformasie. Dit is een van die redes waarom die munisipaliteit sukkel om sy kapitaalbegroting te bestee. In die boekjaar 2005/06 is minder as die helfte van dié begroting bestee.

"Plakkery en die onwettige gebruik van grond is 'n groot bekommernis. Daar is 250 000 gesinne op die stad se behuisingswaglys. Dié lys groei elke jaar met 16 000 gesinne/mense. Zille sê die stadsraad kyk na ander oplossings. Een moontlikheid is om gedienste grond beskikbaar te stel aan mense wat hul eie huise wil bou. Die stadsraad en drie banke het 'n ooreenkoms gesluit wat meer mense in laer inkomstegroepe toegang tot lenings sal gee."

26 Mei 2006