Zim-boere se grond nie meer beskerm

Suid-Afrikaanse boere wat gemeen het hulle kan op die Regering steun om hul eiendom in Zimbabwe te beskerm, is nou glo hul plase kwyt.

Luidens 'n berig in Landbouweekblad se susterpublikasie Rapport het Zimbabwe se minister van sekuriteit (wat ook vir grondsake verantwoordelik is), mnr. Didymus Mutasa, in 'n onderhoud met die koerant gesê die laaste hoop op 'n verdrag tussen die regerings van die twee lande om Suid-Afrikaanse boere se grondregte te beskerm, is finaal van die baan.

"Dit is te laat, daar is nie meer plase om te beskerm nie. Ál die plase is reeds deur die regering oorgeneem en aan Zimbabwiërs gegee. Dit sal sinneloos wees om 'n ooreenkoms te teken op eiendomsreg wat nie meer bestaan nie. Die plase behoort aan ons. Ons kan nie vir ons eie grond betaal nie," het Mutusa luidens die berig gesê.

Mutasa se uitlatings en die Zimbabwiese regering se klaarblyklike besluit om nie tot Suid-Afrikaanse boere met grond in Zimbabwe se redding te kom nie, sal tot groot teleurstelling en verliese lei.

Landbouweekblad het verskeie kere berig oor die uitstel van die bilaterale ooreenkoms vir die beskerming van wedersydse beleggings in die twee lande. Luidens vroeëre berigte is die ondertekening telkemale uitgestel weens die afwesigheid van die Zimbabwiese minister. 'n Ooreenkoms is nooit vroeër bereik nie omdat die Zimbabwiese regering nie tevrede was met die inhoud van die voorgestelde ooreenkoms nie.

Onder die Suid-Afrikaanse boere is mnr. Crawford von Abbo, bekende Vrystaatse boer, wat al miljoene rande se skade gely het sedert daar op sy grond in Zimbabwe beslag gelê is.

20 Januarie 2005