Mnr. Corné Louw, hoof van toegepaste ekonomie en lededienste by Graan SA, sê daar is proaktief gewerk om te verseker dat al die prosesse gereed is om reeds hierdie seisoen aan die protokol te voldoen en te kan uitvoer. “Ingevolge die protokol moet daar gedurende die groeiseisoen waarnemings in die lande gedoen word vir sekere siektes en plae waaroor ooreengekom is en dit is reeds gedoen. Dit is moeilik om te voorspel wat gaan gebeur, maar ek hoop ons gaan reeds hierdie seisoen uitvoer na China sien. Die prys is beslis reg daarvoor.”
Hy sê Graan SA het saam met die waardeketting en owerhede sedert 2019 hard gewerk om die Chinese mark vir sojabone oop te maak. Die sojaboonproduksie in Suid-Afrika het sterk gegroei die afgelope paar seisoene, dermate dat Suid-Afrika op ’n meer konstante basis genoeg vir plaaslike verbruik en verwerking kan produseer.
Graan SA sê om produsente volhoubaar en winsgewend te hou, is dit belangrik om nou alternatiewe markte te vind. Die ondertekening van die protokol was net die oopmaak van die Chinese mark ten opsigte van regulatoriese prosesse. Die vrye mark en infrastruktuur moet steeds die handel moontlik maak en die belangrikste is nou om toepassingsplanne te aktiveer.
