Die skakelkomitee vir die oeskattings het in sy finale oorsig, waarin werklike lewerings en terughoudings op plase ook in berekening gebring is, 2022 se mielie- en sojaboonoeste nog opwaarts aangepas. Dit volg nadat doemprofete verlede jaar deurgaans gesê het die oesgroottes word oorskat weens die nat toestande wat gegeld het.
Die finale skatting vir kommersiële mielies deur die nasionale oesskattingskomitee (NOK) in November verlede jaar was 15,387 miljoen ton. Die komitee het dit nou met ’n verdere 82 800 ton (0,54%) tot 15,470 miljoen ton opgestoot. Die komitee grond sy finale berekeninge op werklike lewerings van 14,566 miljoen ton, nog lewerings van 337 000 ton tot einde Februarie en terughoudings vir eie gebruik op plase van 567 000 ton.
Die herberekende oesgrootte vir witmielies is 7,850 miljoen ton, wat 60 250 ton (0,77%) meer is en vir geelmielies is dit 7,620 miljoen ton, wat 22 550 ton (0,30%) meer is as die finale skatting.
Die sojaboonoes is nou 2,230 miljoen ton, wat 29 000 ton (1,32%) meer is as die finale skatting. Sojabone se werklik lewerings was 2,162 miljoen ton, nog lewerings van 26 000 ton word verwag en terughoudings word op 42 000 ton bereken.
Die sonneblomoes is onveranderd gelaat op 845 550 ton en die sorgumoes is ook onveranderd gelaat op 103 140 ton. Vir grondbone is die finale oes nou 48 500 ton, wat 500 ton (1,02%) laer is as die finale skatting.
Die 2022-’23-produksieseisoen
Mnr. Wandile Sihlobo, senior landbou-ekonoom van die landbousakekamer Agbiz, sê Suid-Afrika kan spog met ’n beter seisoen as wat aanvanklik verwag is en daar is ietwat meer voorraad vir die 2022-’23-bemarkingsjaar beskikbaar.
“Ons klem het egter nou verskuif na die 2022-’23-produksieseisoen waar aanplantings op ’n ietwat slegte noot begin het met oormatige reën en vertragings van rofweg ’n maand in sommige gebiede. Die aanduidings op die oomblik is dat Suid-Afrika steeds ’n redelik goeie produksiejaar kan hê en met die oordragvoorraad wat reeds gedurende die vorige oes opgebou is, lyk dit of Suid-Afrika vir nog ’n seisoen ’n netto uitvoerder van veral mielies sal bly.”
Dr. Werner Rossouw, uitvoerende direkteur van Silostrat, wys daarop dat daar die afgelope ses jaar die vier beste opbrengste en die vier grootste oeste ooit van mielies was en hy glo dat die huidige seisoen ook goed sal wees.
Die eerste produksieskatting vir die somergewasse wat tans op die lande is word op 28 Februarie bekend gemaak.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
