Ná ’n lang wag kom ’n noemenswaardige besending kanolasaad op 15 Maart in Suid-Afrika aan, net voor planttyd vir die komende winter. “Ná verwagting gaan net sowat 80% van die kanolasaad wat Suid-Afrika vanjaar benodig, ingevoer word,” het mnr. Koos Blanckenberg, voorsitter van die spesiale werkgroep vir kanola, op Graan SA se jaarkongres gesê.
“Heelwat saad gaan ook oor die laaste twee weke van Maart met vliegtuie inkom. Ons wag net nog om bevestiging van vlugnommers en tye te kry.”
Teruggehoude saad
Blanckenberg het aangedui dat die bedryf verwag dat net sowat 80% van Suid-Afrika se kanolasaad-behoefte ingevoer en beskikbaar sal wees. “Daar kan ’n tekort van 20% van nuwe saad wees. Om dit aan te vul sal produsente graan moet terughou om te kan plant,” het mnr. Corné Louw, hoof van toegepaste ekonomie en lededienste by Graan SA, gesê.
Mnr. Andries Theron, voorsitter van die Proteïennavorsingstigting (PNS), het teen middel Februarie vir Amelia Genis van Landbouweekblad gesê die probleem met saadbeskikbaarheid kom nou al ’n derde jaar voor, en kan meebring dat boere tot ’n groter mate hul eie saad vermeerder.
Theron het verduidelik dat kanola wat van teruggehoude saad geoes is, weer geplant kan word, maar hoewel dit nog nie getoets is nie, kan die opbrengsverliese en siekteprobleme veel groter wees as die 3-24% wat in 2021 in proewe op Langgewens waargeneem is.
Hou kommunikasiekanale oop
Blanckenberg het produsente op die kongres versoek om seker te maak dat hulle van nou tot met planttyd kommunikasiekanale oor die beskikbaar van saad vir hul bestellings oophou. “Hou aan om met ons te kommunikeer waar jy sukkel. Die ketting van die saad om by die boer te kom is lank en kommunikasie is moeilik, maar onthou Corné is voortdurend in kontak met die maatskappye.”
Die werkgroep oorweeg om later vanjaar Australië te besoek om met saadmaatskappye daar te vergader en die plaaslike boere se erns met die verbouing van kanola en ’n groeiende bedryf onder hul aandag te bring.
Mnr. Richard Krige, voorsitter van Graan SA se wintergraanwerkgroep, het verduidelik dat hoewel die meeste van Suid-Afrika se saad van Kanada af kom, dit die maatskappye in Australië se saad is wat in Kanada vermeerder word om binne Suid-Afrika se planttye saad te kan lewer en dit is hoekom die besoek aan Australië beplan word.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
