Die tweede katoenskatting vir die produksiejaar 2013/14 dui op ’n totale Suid-Afrikaanse kantoenoes van 47 646 bale vesel, wat ’n styging van 1% oor verlede maand se skatting verteenwoordig.
Volgens Katoen SA sal 43 646 bale na raming in die plaaslik geproduseerde katoenpluksel gelewer word, ’n styging van 68% oor die vorige seisoen. Die balans van sowat 4 000 bale vesel het betrekking op die verwagte Swazilandse produksie wat deur dié land se pluismeule verwerk sal word.
Mnr. Hennie Bruwer, uitvoerende hoof van Katoen SA, sê die wêreld-katoenproduksie vir 2014/15 sal na verwagting redelik stabiel op 33 miljoen hektaar bly, min of meer dieselfde as vir 2013/14. Volgens die Internasionale Raadgewende Katoen-komitee (ICAC) sal die laer verwagte katoenproduksie in China vir 2014/15 weens sy nuwe katoenbeleid, deur hoër produksie in ander lande, veral Amerika, uitgebalanseer word.
“Gedurende die afgelope twee maande het Amerika en China veranderings aan hulle landboubeleid aangekondig. Die uitwerking daarvan op die Amerikaanse katoenproduksie kan wees dat katoenhektare na raming met ongeveer 9% sal toeneem omdat katoenpryse na verwagting betreklik hoër as die van mededingende gewasse soos mielies sal wees. In China sal die verwagte katoenhektare met 9% in 2014/15 afneem,” sê Bruwer.
