Samewerking tussen die internasionale gewasnavorsingsinstituut vir die semi-ariede trope (ICRISAT) en Seed-Co het gelei tot die ontwikkeling van ’n witsorghum- (groot giers) kultivar wat ’n opbrengspotensiaal van tot 8 t/ha en ’n 25%-opbrengsverhoging bo bestaande kultivars bied. Dié kultivar beloof ook groter veerkragtigheid teen wisselvallige reënval.
Luidens ’n verklaring sê dr. Jacqueline Hughes, direkteur-generaal van ICRISAT, die nuwe sorghumkultivar is ’n beduidende prestasie wat voortspruit uit innoverende navorsing.
“Hierdie deurbraak is ’n uitstekende voorbeeld van hoe ICRISAT se navorsingspogings bydra tot die welstand van boere en hul gesinne reg oor die vasteland, tot globale voedsel- en voedingsekerheid, en uiteindelik tot die bereiking van die volhoubare ontwikkelingsdoelwitte.”
Dr. Hapson Mushoriwa, ICRISAT se hoofwetenskaplike vir Oos- en Suider-Afrika, sê die nuwe kultivar is binne 85 tot 118 dae oesgereed en bied goeie weerstand teen algemene blaarsiektes, terwyl sy sterk strooi ’n goeie staanvermoë verseker wat noodsaaklik is vir doeltreffende en winsgewende gewasproduksie.
“Hierdie nuwe kultivar is goed aangepas by die landboutoestande van Zimbabwe. Dit bied ’n belowende oplossing vir sorghumboere, veral in die streke met matige tot wisselvallige reënvalpatrone.”
Dr. Rebbie Harawa, ICRISAT se streeksdirekteur vir Kenia, Oos- en Suider-Afrika, sê alle belanghebbendes in die ontwikkeling van die kultivar verdien lof vir hul volharding in die bestuur van sy multi-omgewingproewe oor drie opeenvolgende seisoene.
Hughes sê die nuwe kultivar is ’n belangrike stap in die rigting van ’n meer veerkragtige en voedselveilige toekoms vir Afrika is.
Dr. Gorden Mabuyaye, Seed-Co se internasionale navorsings-en-ontwikkelingshoof, sê in hul samewerking met ICRISAT streef hulle daarna om innoverende en hoëpresterende saad na die mark te bring.
“Ons vennootskap het ’n gunstige impak op boere en hul inkomste en hierdie nuwe kultivar sal baie help om die gevolge van klimaatsverandering in Afrika suid van die Sahara te versag.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
