Van die land se voorste graanboere en ’n graanboer van Brasilië het op Graan SA se kongres raad met boere gedeel oor hoe om hul boerderye op die regte pad te probeer hou namate die resessiespook internasionaal en plaaslik loop.
Mnr. Giovanni Parzianello is ’n graanboer van Brasilië. Sy familie boer op sowat 27 000 ha met mielies en sojabone. Hulle pas dubbele produksie tydens hul somerseisoen toe. “Ons plant in September reeds ons sojabone aan, en namate ons dit stroop, loop die planter agter die stroper om mielies te plant. Ons mielies moet reeds goed gevestig wees teen Januarie/Februarie. Ons reën kom gewoonlik van September tot April voor.”
Parzianello reken Suid-Afrikaanse boere is op ’n wenpad met die toename in die produksie van sojabone. Volgens die jongste oesskatting is die geskatte oppervlakte onder sojabone 1,148 miljoen ha, wat 223 000 ha (24%) meer is as die vorige seisoen. Die oesskattingskomitee het volgens die eerste produksieskatting van die seisoen aangedui die beraamde sojaboonoes kan 2,652 miljoen ton wees, wat 421 680 ton meer is as die vorige seisoen.
“Julle is in ’n beter posisie as ons om sojabone aan byvoorbeeld China te verskaf. China kom tans al die pad na Brasilië toe om sojabone te kry, maar julle is die helfte nader. Indië het ook nodig om sy groeiende bevolking te voed en hiervoor is julle ook in ’n goeie posisie. Ek dink julle is op die regte pad,” sê Parzianello. “Ek is ook baie beïndruk met hoe goed julle vaar op sandgrond ten opsigte van produksie. Ek het dit nog nie in Brasilië gesien nie, maar ek gaan dit beslis gaan toets.”
Risikobestuur
Op sy beurt het mnr. AC van Wyk, boer van die distrik Bultfontein en wat in 2017 as Graanprodusent van die Jaar aangewys is, aan die begin van die sessie raad gegee van hoe hy sy boerdery aanpas. Hy het gesê dis belangrik dat jy die lesse wat jy in die verlede geleer het, in ag neem vir elke nuwe oes.
’n Boer moet volgens hom sy risiko bestuur in ooreenstemming met wat sy grond kan lewer, maar ook om vooruit te beweeg. “Kies ’n risikobestuursmodel wat van pas is vir jou loopbaan, boerdery en persoonlikheid. Dis belangrik dat dit ook by jou persoonlikheid pas sodat jy die spanning wat die werk meebring, kan hanteer. “
’n Gelyke tafel
Mnr. André Brink, van Groot Phesantekraal in Durbanville wat in 2022 as Graanprodusent van die Jaar aangewys is, sien sy boerdery as ’n tafel met vier pote en die tafelblad kan net gelyk bly as al vier pote in balans bly. Die een poot verteenwoordig aspekte buite die boer se beheer, soos klimaatsverandering, maar steeds iets wat hy kan probeer bestuur deur byvooreeld vogbestuur toe te pas.
Die tweede poot verteenwoordig alle koste-items soos kunsmis en insetkoste wat goed bestuur moet word, terwyl die derde poot die bedryfskapasiteit van jou plaas of eiendom is – “jy kan net werk met wat jy het, want wat jy het, is wat jy het.”
Die vierde poot is familieboerdery en vir Brink is dit baie belangrik om seker te maak dat kontinïuteit voortduur wanneer die familieboerdery van een geslag na die volgende oorgaan. “Dis gewoonlik ’n stop-start-situasie, maar ek beplan en werk hard daaraan om met my twee seuns nie ’n stop-start-metode te volg nie, dit belemmer die vordering van die boerdery.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
