Met ’n totale plaaslike perskapasiteit van 2,1 miljoen ton en ’n geskatte oes van 2,8 miljoen ton, sal Suid-Afrika nóg diepsee-uitvoerkontrakte moet beding om die surplus weg te werk, het mnr. James Hellawell, handelaar van Silostrat, op dié graanhandelaar se boeredag op Welkom gesê.
“Ons moet vir mekaar sê daar is op die oomblik baie soja in die land. Die risiko is dat pryse vorentoe onder druk kan kom.” Pryse vir lewering in Julie was teen druktyd R800 onder uitvoerpariteit, wat Suid-Afrikaanse sojabone goedkoper maak as dié van Argentinië, Brasilië en Amerika.
Hoewel dit ’n geleentheid skep vir uitvoer, is daar ’n vangplek. “Daar is net ’n beperkte hoeveelheid uitlaaigleuwe by die hawens beskikbaar omdat dit die tydperk is waarin ons reeds ’n klomp mielies uitvoer.”
