Die Oos-Kaapse vleisbeesboer mnr. Peter Louwrens is al lank geesdriftig oor die kweek van multispesie-weiding om sy beeste én sy plaas se grond te bevoordeel. Hy het jare se ondervinding met verskillende plantsoorte.
Hy is baie geïnteresseerd om die vee, gewasse en ander lewe op sy en ander plase noukeurig waar te neem. In April 2011 het hy toevallig ’n onverwagse ontdekking gedoen toe hy op sy plaas Combles tussen mielies geloop het wat amper oesgereed was. Al was die skadu van die mielies se blaardak dig, het ’n klein, lowerryke groen lappie hom opgeval wat soos ’n grassoort gelyk het.
“Ek was veral nuuskierig omdat die plant so goed gegroei het al was dit herfs (’n koeler en droër tyd), én boonop in die skadu onder die mielieblare. Dit het nie gelyk soos enige onkruid wat ek ken nie en ek het navorsing gedoen om dit te identifiseer.”
