Te oordeel aan die huidige lewering van gevestigde en nuwe tamatieprodusente aan die nasionale varsproduktemarkte lyk dit asof die normale volumes vir hierdie tyd van die jaar gehandhaaf sal word, sê mnr. Derek Evans, Bertie van Zyl (Edms) Bpk. se verspreidingsbestuurder vir ZZ2: tamaties.
In die somerseisoen word produksie beïnvloed deur haelstorms, uitgerekte reëntoestande en bewolkte weer asook groot wisseling tussen dag- en nagtemperature.
Baie onlangs (weke 5 en 6) was die markte effe ondervoorsien weens die slegte weerstoestande, maar met die huidige getal produsente kan dit oornag in ’n situasie van oorvoorsiening verander, maar alles behoort na normaal terug te keer wanneer die weer opklaar.
In die algemeen is daar nou ’n tekort aan tamaties van goeie gehalte weens die weerstoestande, maar dit kan vinnig verander wanneer weerstoestande na normaal terugkeer.
“Ons is positief oor die die netwerk van varsproduktemarkte wat ons vir 80% van ons produksie-afset gebruik. Die waarde van hierdie laekoste verspreidingsentrums bevoordeel alle rolspelers, verbruikers, produsente én die markowerhede self. Die markte se prysvasstellingsmeganisme is van groot waarde vir die produsent én die verbruiker. Ons verwag nie prysstygings op lang termyn nie, want daar is genoeg produsente oor die land versprei om die vereiste volume tamaties te lewer,” sê Evans.
