Mnr. Jose de Kock, ’n boer van Napier en voorsitter van Graan SA se garswerkgroep, glo die seisoen wat voorlê, lyk baie gunstig aangesien boere vanjaar se plantseisoen met goeie ondergrondse vog sal wegtrek.
Volgens De Kock was dit lanklaas dat boere dié tyd van die jaar reeds so ’n goeie hoeveelheid grondvog kon bewaar.
Vanweë die vroeë reën kan onkruid wat nou opkom, voor planttyd bestry word. “Op die stadium, met die reën wat ons Desember gehad het en die opvolg wat ons nou weer gehad het, gee dit vir ons ’n goeie geleentheid om die onkruidopslag dood te spuit.”
Boere in sy area sal ná die goeie reën begin Maart en reën wat nou weer geval het, waarskynlik binnekort begin weidings plant en teen middel April begin kanola plant.
Die voordeel van goeie grondvog so vroeg in die seisoen is dat die verskillende tipes graan nou op die regte tyd geplant kan word, sê De Kock. Die ontkieming van die verskillende gewasse sal beter versprei wees.
“Die seisoen en die verspreiding van die graan sal baie beter wees as vorige jare toe ons in die stof moes geplant, en toe die reën kom, toe kom alles gelyk op.”
Volgens mnr. Rossouw Swart, wat naby Buffeljags boer, het sommige boere in die area sedert Januarie al meer reën gemeet het as wat hulle verlede jaar gedurende die groeiseisoen tot in September gemeet het.
Hy voeg by dat die boere in sy omgewing optimisties oor die komende jaar is, want hulle spring weg met goeie grondvog. “Ons weet nie hoe die jaar gaan afloop nie, maar die wegtrek is met blydskap.”
Danksy die goeie ondergrondse vogvlakke is boere in sy omgewing reeds besig om weidings soos hawer aan te plant, en behoort die eerstes binnekort op te kom. Hy verwag dat boere vanjaar ’n week of twee vroeër sal begin om hul kontantgewasse te plant.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
