Amarula is die enigste Suid-Afrikaanse verteenwoordiger in die top 100-spiritualieë-handelsmerke ter wêreld en beklee nommer 81 op die lys. Die bepaling is gemaak volgens volumes verkoop en behels handelsmerke wat jaarliks meer as ’n miljoen 9 liter-kaste verkoop. Die lys is saamgestel deur Impact Databanks, ’n hoogs aangeskrewe Amerikaanse maatskappy wat beskou word as die voorste bron vir statistiek oor die drankbedryf.
Ander pluimpies sluit in Amarula se posisie van 36ste op die Internasionale Wyn-en-spiritualieë-navorsing, ’n Britse datamaatskappy, se lys van gewildste spiritualieë-handelsmerke wat wêreldwyd deur dié belastingvrye kanaal verkoop word. Dié unieke likeur is ook deur Drinks International aangewys as die sesde gewildste likeur wat in internasionale stylkroeë versoek word. Volgens die Sunday Times se Top Brands-peiling is Amarula plaaslik ook onder die top-10 spiritualieë,.
Die handelsmerk word in meer as 100 lande verkoop en word hoog aangeskryf vanweë sy unieke smaak en verbintenis met Afrika se olifante.
Betrokke by gemeenskap
Me. Siobhan Thompson, bemarkingswoordvoerder, meen Amarula se reputasie kry danksy steun vir maatskaplike en omgewings-volhoubaarheid ’n aansienlike hupstoot. Die Amarula-trust is sonder winsbejag geskep om navorsing oor olifantgedrag te finansier. Hierdie navorsing, onder leiding van prof. Rob Slotow van die Universiteit van KwaZulu-Natal, lê ten grondslag van olifantbewaringsprogramme in openbare en private wildreservate en geniet wêreldwye erkenning.
Die trust betaal ook vir die opleiding van jongmense as veldwagters en finansier werkskeppingsprogramme, maak boorgate en hou dit in stand om te sorg dat gemeenskappe naby Phalaborwa in Limpopo toegang tot drinkwater het. Daarby bestuur dit ’n sentrum vir vroeë leerfase vir jong kinders naby die dorp. Baie van dié kinderse se ma’s versamel maroelavrugte vir Amarula.
“Wanneer mense besef dat hul steun vir Amarula gemeenskappe in stand hou en bewaring bevorder, kies hulle dié handelsmerk selfs geredeliker,” het Thompson gesê.
