Agt boere van die Piketberg-distrik wil graag mede-boere wat elders in die land onder erge droogte gebuk gaan, ondersteun. Dié agt is bereid om agt treintrokke vol voer te maak, en hulle is op soek na ’n trein.
Mnr. Pierre Liebenberg van die plaas De Hoek het luidens Volksblad gesê hulle wil graag sukkelende boere in die Vrystaat, Noordwes en die Noord-Kaap bystaan. “Ons wil daardie boere net help. Die droogte het hulle uitgemergel. Môre, of oor ’n jaar, loop ons dalk dieselfde paadjie en dan sal dié boere ons weer help.”
Hulp van die staat
Liebenberg sê hulle is bereid om die voer verniet te baal. Hulle het egter hulp van die staat nodig om die voer tot by die boere te kry. Die gebruik van een so ’n trok kos nagenoeg R35 000, sonder die koste van seile wat oor ’n trok gespan moet word.
Mnr. Gerrit van Rensburg, Wes-Kaapse minister van landbou en landelike ontwikkeling, het aan die koerant gesê hy onderhandel nou met Transnet om ’n trein beskikbaar te stel.
Bron: Volksblad
