Dr. Keith du Plessis. Foto: Verskaf
Dr. Keith du Plessis is die nuwe besem by Casidra, die Wes-Kaapse organisasie wat hom vir landelike ontwikkeling beywer.
Hy sal sy plek as uitvoerende hoof op 1 Junie inneem.
“Du Plessis het ’n passie vir mense en sy persoonlike visie is om hoop en inspirasie te bring vir almal wat hy teëkom,” lui ’n mediaverklaring.
Hy het meer as 19 jaar ervaring in die landbouwaardeketting. Hy was meer as nege jaar by die Landbounavorsingsraad betrokke en langer as ’n dekade die hoof van landbouverwerking by die Coega-ontwikkelingskorporasie in die Oos-Kaap.
Hy het talle kwalifikasies agter sy naam, onder meer die grade PhD en MSc in mikrobiologie, MPhil in omgewingsbestuur en MBA van die Universiteit Stellenbosch se sakeskool. Hy studeer tans vir ’n regsgraad deur Unisa.
