Dit maak wêreldwyd opslae dat KwaZulu-Natal die voorkoms van hondsdolheid tot die laagste in die afgelope 26 jaar beperk het, sê mnr. Kevin le Roux, provinsiale projekbestuurder vir hondsdolheid.
Le Roux, van die provinsie se direktoraat veeartsenydiens, het op Wêreld-hondsdolheidsdag in Johannesburg gesê dié prestasie is behaal deur volgehoue inentingsveldtogte in die provinsie.
Die regeringsondersteunde projek, wat aanvanklik ’n gidsprojek van die Bill en Melinda Gates-stigting was, was só suksesvol om die voorkoms van hondsdolheid in die provinsie te verlaag dat die projek dalk ook na Lesotho en ander Afrikalande kan uitbrei.
Volgens Le Roux is 45 voorvalle van hondsdolheid per maand in 2007 in die provinsie aangemeld. Danksy die verhoging van inentingsgetalle, is dit verlaag tot die huidige bykans drie per maand.
Lees meer in Landbouweekblad se uitgawe van 11 Oktober 2013.
