Mnr. Sean Walsh, uitvoerende hoof van Kaap Agri, het tydens die bekendmaking van die maatskappy se halfjaar finansiële resultate (tot einde Maart) gesê die meeste landboubedrywe verwag goeie oeste, maar boerderye se winsgewendheid hang van weerstoestande af, terwyl wegholstygings in produksieskoste, veral kunsmis, winste kan knou.
Hy meen die koring- en kanolavolumes kan in die nuwe boekjaar normaliseer ná twee jaar van rekordoeste.
“Die koring- en kanola-aanplantings sal soortgelyk wees aan die vorige jaar, maar ons volumes sal waarskynlik nie dieselfde wees nie, want die reën is reeds laat.”
Hy verwag ook dat vrugte-uitvoer die wind van voor gaan kry weens bykomende koste in die verskaffingsketting en laer pryse op buitelandse markte.
“Die logistieke probleme bly, maar voortdurende samewerking tussen hawe-owerhede, logistieke operateurs en boerdery-ondernemings sal bydra om hawens doeltreffender te maak.”
Volgens Walsh sal die volle impak van die konflik tussen Rusland en Oekraïene nog gesien moet word.
“Sanksies kan Suid-Afrika se uitvoer na dié markte demp. Dis ook kommerwekkend dat Rusland die wêreld se leidende uitvoerder van kunmisgrondstowwe is.”
Goeie prestasie
Volgens mnr. Graeme Sim, finansiële direkteur, was die groep se prestasie steeds goed te midde van groot handelskwessies. Bruto wins het met 14,2% gegroei.
“Inkomste het met 26,7% gegroei tot R7,2 miljard met verkope wat 22,9% toegeneem het. Die aantal transaksies het met 7,7% gegroei, aangedryf deur nuwe transaksies, hoofsaaklik van The Fuel Company se kant af.”
In dié tyd het produkinflasie meer as 20% beloop.
Kaap Agri se verdienste voor rente, belasting en amortisasie (ebidta) het met 13% gestyg tot R398 miljoen (dit sluit enige winste wat die maatskappy ontvang of betaal het uit). Herhalende wesensverdienste het met 15% toegeneem en die herhalende wesensverdienste per aandeel het met 351 sent gegroei.
“Ons het ’n halfjaardividend van 46c verklaar. Dis 15% op teenoor verlede jaar se halfjaardividend van 40c per aandeel.
Ten spyte van slegs die tweede keer in dertien jaar dat inflasie bo 10% was vir talle van Kaap Agri se afdelings, kon die maatskappy sy markaandeel vergroot. Veral Agrimark, New Holland, Agrimark Grain en Forge het fluks gegroei die afgelope ses maande, sê Walsh.
“Die brandstofsektor het 5% tot 8% minder brandstof verkoopn die tydperk, maar die Kaap Agri-groep se verkope is slegs 1,3% af. Dis danksy boerdery- en kommersiële volumes wat gegroei het, terwyl pendelaar-volumes gedaal het.
“Groot belanghebbendes in die boumateriaalsektor se verkope was ook af van Januarie tot Maart, terwyl Agrimark se verkope op is met 7,5%.
“En derdens, is die relatiewe hoë persentasie nuwe klante aan wie ons kredietgeriewe toegestaan het ’n goeie aanduider van die gesondheid van ons landboubesigheid. Nuwe klante maak in waarde sowat 30% van groter geriewe uit.”
Die eerste ses maande se verdienste dra gewoonlik die grootste deel by tot die voljaarverdienste.
“Ons verwag dat die algehele prestasies in ooreenstemming sal wees met die bestuur se mediumtermynteikens,” sê Walsh.
Zeder se ontbondeling van Kaap Agri-aandele het sowat vier dae ná die verslagdoeningstydperk gebeur.
“Aandeellikiditeit sal na verwagting toeneem en Kaap Agri verwelkom alle nuwe aandeelhouers.”
