Met bestaande, bewese sonkragtegnologie is dit heel moontlik om groot hoeveelhede water oor groot afstande met sonpompe te verplaas. Boonop het dit bekostigbaarder geword. Dit is nou moontlik om seewater die binneland in te pomp na ’n verdampingspan waar soute, minerale en vars water herwin kan word.
Die idee behels die volgende: ’n Sonpompstasie word bo die hoogwatermerk by die see opgerig waar seewater bekom word deur ’n put wat tot onder die watervlak gegrou word met die idee dat die strand as filter dien om skoon seewater te bekom.
Die pompgrootte, drukhoogte en deursnee van pype bepaal die afstand wat gepomp kan word. Pompstasies kan in serie opgerig word. Afstand word dus net ’n kostefaktor. By die eindpunt is daar ’n verdampingspan, groot genoeg vir die volume water beskikbaar. Die seewater word in die pan gepomp om afgedamp te word deur die son.
