Die landboubeleggingsmaatskappy Zeder het aangekondig dat hy sy belang van 42,2% in Kaap Agri gaan ontbondel, wat beteken dat die PSG Groep, wat 48,6% van Zeder besit, dan 20,5% van Kaap Agri sou besit het.
Die PSG Groep het egter ’n paar dae later bekend gemaak dat hy sy Kaap Agri-aandele na sy eie aandeelhouers gaan ontbondel. Mnr. Anthony Clark, ontleder van veral landbou- en voedselmaatskappye, sê Zeder-aandeelhouers sal 1 Kaap Agri-aandeel kry vir elke 49,22692 Zeder-aandele wat hulle besit.
Dit is nog onbekend wat die verhouding van die PSG Groep se beoogde ontbondeling van sy belang in Kaap Agri gaan wees. “In wese gaan daar ’n skielike styging van 42,2% in die likiditeit in Kaap Agri wees omdat meer aandeelhouers die aandele gaan besit, en nie net een of twee partye nie.
