Die groep, met sy hoofkantoor op Ladybrand, het 53 handelstakke en sy bedrywighede strek oor vier provinsies: die Vrystaat, die Oos-Kaap, die Noord-Kaap en Noordwes.
Mnr. Stéfan Oberholzer, OVK se besturende direkteur, sê die koopkrag van produsente het in dié boekjaar verbeter danksy relatiewe goeie opbrengste en hoë produkpryse. “Die verbeterde koopkrag van ons produsente het veroorsaak dat die agterstalligheid van ons debiteureboek op ’n rekordlae vlak is.”
OVK behaal ’n rekordwins voor belasting, veselrabat en lojaliteitskorting van R287,5 miljoen. Dit verteenwoordig ‘n styging van 30% op ’n jaargrondslag teenoor die vorige syfer van R220,7 miljoen. Die wins ná belasting het met 36,09% van die vorige boekjaar se R143,4 miljoen tot R195,2 miljoen gegroei.
Die groep se omset in die finansiële state is R5,8 miljard, wat ’n styging van 16,6% teenoor die vorige boekjaar se R5,04 miljard beteken. Die omvang van die groep se sakebedrywighede in die boekjaar wat op 28 Februarie 2022 geëindig het, het egter tot R11,19 miljard gegroei, wat ’n styging van 13% teenoor 2021 se R9,86 miljard is.
Die handelsafdeling, wat brandstofverkope insluit, was ’n uitblinker met ’n winsstyging van 25,6% wat aan die hoër omset toegeskryf word. Die graanafdeling het sy prestasie met 14,2% verbeter en vesel, wat ’n kernaktiwiteit is, het sy wins met R26,2 miljoen (voor uitbetaling van die rabatskema) verbeter. Die meganisasie-afdeling het ’n ommeswaai beleef en die eerste keer in 12 jaar met ’n wins afgesluit.
“OVK beleef tans ongelooflike sukses en dit gaan goed met die besigheid. Maar omgewings verander binne ’n oogwink en en OVK sal sy strategie hierby moet aanpas,” sê mnr. Chris Bender, voorsitter van die OVK-groep. Hy het onder meer kwessies soos die verval van infrastruktuur op die platteland, beurtkrag, swak ekonomiese groei en stygende pryse uitgelig. OVK help reeds sy produsente wat sulke probleme ondervind. Die maatskappy het byvoorbeeld in die afgelope boekjaar “wesenlike kapasiteitsuitbreiding” by silo’s gedoen en Bender sê dit neem die risiko van graan wat vir ’n tydperk opgeberg moet word, van die produsent se skouers af. Hy sê OVK is ’n maatskappy wat finansiering kan verskaf in ’n landbou-omgewing waar talle finansiers die bedryf verlaat.
OVK se boere-aandeelhouers het in die afgelope boekjaar R94 miljoen in die vorm van dividende en lojaliteitskortings ontvang, teenoor R72 miljoen in 2021. “Die lojaliteitsvoordeel het menige produsent gehelp om die droogte te oorleef,” sê Oberholzer.
