Mnr. Louis Smit, besturende direkteur, het dié aankondiging op Suidwes se onlangse jaarvergadering gedoen. Aandeelhouers het in April vanjaar besluit om ’n deel van Suidwes Beleggings se aandele terug te koop en ’n aansporingskema vir kliënte in te stel.
Die terugkoop van die aandele en die instelling van die aansporingskema was onderhewig aan die verkoop van die maatskappy se debiteureboek aan die Land Bank.
Dié transaksie is afgehandel toe die Land Bank nagenoeg R850 miljoen aan Suidwes oorbetaal het. Aanbodbriewe vir die terugkoop van aandele is reeds aan alle aandeelhouers gestuur en die uitbetalings word in die eerste week van Oktober gedoen.
Die aandele-terugkoopaanbod aan aandeelhouers was vrywillig en ná afhandeling van dié proses sal Suidwes Beleggings omgeskep word in ’n private maatskappy.
Die terugkoop van aandele bedra sowat R200 miljoen, terwyl ongeveer R40 miljoen aan Suidweskliën te terugbetaal word ten opsigte van die aansporingskema om hulle te beloon vir hul ondersteuning in 2012/’13.
“Hierdie kontantinspuiting kom in ’n stadium dat aandeelhouers en boere in die Suidwes-bedieningsgebied geteister word deur ’n ernstige droogte, wat reeds twee jaar duur. Dit bied broodnodige verligting aan boere wat finansiële druk ervaar weens ondergemiddelde oeste,” sê Smit.
